Kreu i Partisë për Liri, Drejtësi dhe Mbijetesë, Nenad Rashiq, ka deklaruar se shumica e votave të subjektit të tij politik vijnë nga komuniteti serb në Kosovë, duke kundërshtuar pretendimet e Listës Serbe se mbështetja për partinë e tij është kryesisht nga zonat me shumicë shqiptare.
Sipas tij, nga rreth 5.300 deri në 5.400 vota të fituara, mbi 3.200 prej tyre janë marrë në zonat e banuara me shumicë serbe.
Rashiq tha se partia e tij ka shënuar rritje të mbështetjes në të gjithë Kosovën, veçanërisht në veri të vendit, duke e cilësuar këtë si tregues të besimit në rritje nga qytetarët.
Ai gjithashtu foli për presione gjatë fushatës zgjedhore, të cilat i atribuon përfaqësuesve të Listës Serbe dhe zyrtarëve nga Beogradi. Sipas tij, këto presione kanë pasur për qëllim ndikimin e vullnetit të lirë të votuesve.
Rashiq pretendoi se gjatë fushatës ka pasur shantazhe dhe frikësim ndaj qytetarëve, duke e cilësuar situatën si ndërhyrje në procesin zgjedhor.
Ai shtoi se qytetarët kanë votuar pavarësisht këtyre presioneve, duke theksuar se mbështetja për subjektin e tij po rritet në mënyrë të qëndrueshme.
