Aktori amerikan James Handy, i njohur për paraqitjet e tij në filmat “Top Gun: Maverick” dhe “Jumanji”, ka ndërruar jetë në mënyrë tragjike pasi u gjet i therur në një banesë në Los Angeles.
Sipas autoriteteve, për vrasjen është arrestuar 44-vjeçari Michael Gledhill, djali i partneres së aktorit, i cili dyshohet se kreu sulmin fatal.
Ngjarja tronditëse ndodhi pasi policia iu përgjigj një telefonate emergjente në numrin 911. Sipas raportimeve, telefonuesi deklaroi:
Unë jam biri i njeriut, sapo vrava njeriun e mëkatit.
Kur oficerët mbërritën në vendngjarje, gjetën 81-vjeçarin Handy në oborrin e shtëpisë me plagë të rënda në gjoks dhe pa shenja vetëdijeje. Ai u transportua menjëherë në spital, por mjekët nuk mundën t’i shpëtonin jetën.
Hetimet paraprake tregojnë se i dyshuari jetonte në të njëjtën shtëpi me nënën e tij dhe aktorin. Pas mbërritjes së policisë, ai thuhet se e identifikoi vetë veten si personin e kërkuar nga autoritetet.
Gledhill është arrestuar me akuzën e vrasjes dhe aktualisht mbahet në paraburgim, ndërsa gjykata i ka caktuar një garanci prej 2 milionë dollarësh.
James Handy, i lindur në New York, ndërtoi një karrierë të gjatë në film dhe televizion. Ai u bë i njohur për rolin e “shfarosësit” në filmin Jumanji dhe për interpretimin e baristit Jimmy në “Top Gun: Maverick”.
Përveç filmave, ai u shfaq edhe në seriale të njohura televizive si NCIS: Los Angeles, The Closer dhe Cold Case.
Pas lajmit të trishtë, agjencia e tij, Ellis Talent Group, shprehu ngushëllimet duke e përshkruar aktorin si “jashtëzakonisht të talentuar, të përulur dhe të sjellshëm”, ndërsa kolegë dhe admirues të tij kanë reaguar me pikëllim për humbjen e artistit veteran.
