Trajneri i ri i Kombëtares shqiptare, Rolando Maran, foli në prag të ndeshjes së tij debutuese në krye të kuqezinjve.
Para takimit me Izraelin, tekniku italian u shpreh se është e vështirë që një ekip të konsolidohet në kaq pak ditë, sidomos në fundin e sezonit, por shtoi se skuadra do të bëjë çmos për të marrë fitoren në miqësore.
“Është e rëndësishme të theksoj që kam parë një gatishmëri nga lojtarët. Nuk është e lehtë të vish në fund sezoni. Kam shumë gjëra në mendje, por më e rëndësishmja është që të ketë një skuadër funksionale që i luan këto dy ndeshje. Janë dy ndeshje që do të masin forcën dhe do të duhet të llogariten për të dyja rastet. Kjo është ajo që ka rëndësi, duke shtuar edhe kurajon për të dalë në fushë dhe për të dhënë më të mirën. Kjo ka rëndësi. Sigurisht, siç e kam thënë edhe më parë, në fokus është të jemi në Shqipëri që kërkon të bëjë ndeshjen më të mirë të mundshme. Në kaq pak kohë, ishte e vështirë të përkthenim atë që kemi përgatitur. Por ajo që kam parë unë ishte dëshira e lojtarëve për të dalë në fushë. Kam parë një ekip të motivuar. Të luash me Izraelin nuk është e lehtë, sepse i bën ekipet e tjera të luajnë keq. Nuk duhet të krijojmë shumë hapësira për ta. Por do të jetë një test i mirë për të parë ekipin”, tha Maran.
Tekniku italian, Rolando Maran, u ndal edhe te filozofia e tij e lojës sa i përket asaj që do të sjellë në Kombëtare.
Ai u shpreh se ekipi do të futet gjithmonë në fushë vetëm për fitore dhe për të krijuar “ADN-në” e vetë.
“Koha nuk është asnjëherë e mjaftueshme kur punon me një Kombëtare, sepse janë shumë pak ditë për të punuar me lojtarët. Kryesorja është që ne të kemi, por besoj se ka mjaftuar koha për të pasur një ide se si ne të luajmë. Sigurisht që na ka shërbyer kjo kohë edhe për t’u njohur, do të na shërbejë edhe për t’u përmirësuar nga gabimet. Duhet të kemi qasjen e duhur për t’u futur nesër në fushë. Me sa kam parë, është një sinjal i qartë që skuadra është në pikën e duhur.
Sigurisht që rezultati është i rëndësishëm, por në të njëjtën kohë edhe performanca. Janë dy ndeshje miqësore, por rezultati ka rëndësi. Janë tifozët të cilët shpresojnë që ne do të dalim me fitore. Kur hyn në fushë si skuadër, shpresoj që ne të marrim këtë rezultat. Do të jetë e vështirë, por në momentin që do të kemi një rezultat të mirë, kjo do të ishte perfekte.
Nuk është ndeshja PSG-Arsenal, por është Shqipëria. Ne duhet të krijojmë ADN-në të bazuar në karakteristikat tona. Nëse një trajner e mban të sigurt një idenë e tij, atëherë nuk mund të evoluojë. Futbolli ka ndryshuar, por edhe lojtarët gjithashtu. Ajo që mua më pëlqen është që skuadra të dalë në fushë dhe të mbyllë ndeshjen. Të sigurojë një rezultat pozitiv. Çdo ekip ka veçantitë e veta. Ajo që unë e kam thënë edhe në konferencën e parë, më pëlqen të kem një skuadër agresive dhe të futet në fushë për të fituar. Me Izraelin do të jetë e vështirë dhe një test provues. Unë kërkoj që skuadra të jetë me kurajë dhe personalitet.
Kam provuar disa gjëra, edhe pse ka pasur pak kohë për t’u përgatitur. Jam bazuar te karakteristikat e lojtarëve. Jemi fokusuar edhe te cilësitë e lojtarëve. Kemi edhe një stërvitje sot dhe më pas do të sqarohen gjërat”, tha Maran.
