Qyteti i Shkupit në fillim të muajit maj nënshkroi kontratë për projektimin, furnizimin dhe montimin e pajisjeve për parkun argëtues, si dhe për rregullimin e hapësirës dhe objekteve shoqëruese me kompaninë “Mastef”, me vlerë mbi 620 milionë denarë, ose pak më shumë se 10 milionë euro. Me këtë, pas shumë vitesh premtimesh të pambajtura, pritet të nisë më në fund ndërtimi i parkut argëtues në Parkun e Qytetit, shkruan Sloboden Peçat, përcjell PressOnline.al.
Gjatë procedurës së tenderit, ndërmarrjet publike të qytetit rrënuan diskotekat verore të vendosura rreth ish-lunaparkut për të përgatitur terrenin për ndërtimin dhe vendosjen e pajisjeve të reja.
Megjithatë, në terren ende gjenden mbeturinat e objekteve të rrënuara, nuk është pastruar asgjë dhe nuk ka nisur ndërtimi i hapësirës argëtuese që prej kohësh pritet, veçanërisht nga fëmijët dhe të rinjtë e Shkupit.
Nga Qyteti sqarojnë se aktualisht po zhvillohet faza e projektimit, në bashkëpunim me profesorë dhe ekspertë të fushës.
“Pas përfundimit të procedurës së prokurimit publik, kompania e përzgjedhur është në komunikim me profesorë dhe ekspertë nga Fakulteti i Ndërtimtarisë dhe Fakulteti i Makinerisë, me qëllim që gjatë projektimit dhe ndërtimit të lunaparkut të zbatohen standardet më të larta të sigurisë”, thonë nga Qyteti i Shkupit.
Në pyetjen se sa pajisje do të vendosen dhe nëse do të ketë përmbajtje të reja, si dhe se si do të zgjidhet qasja në komunikacion dhe parkimi, autoritetet thonë se qytetarët do të informohen me kohë.
“Pajisjet që do të vendosen janë në përputhje me specifikimet dhe kërkesat e përcaktuara në prokurimin publik. Për të gjitha detajet shtesë dhe për ecurinë e projektit, opinioni do të informohet me kohë”, përgjigjen shkurtimisht nga atje.
Megjithatë, nuk japin shpjegime se çfarë ka ndodhur me pajisjet që pretendohej se ishin blerë gjatë mandateve të kryetarëve të mëparshëm të qytetit dhe nëse ndonjë prej tyre do të përdoret në lunaparkun e ri.
Lunaparku i ri do të shtrihet në një sipërfaqe të rrethuar prej 28.800 metrash katrorë. Nga Qyteti theksojnë se nuk do të zvogëlohet hapësira e Parkut të Qytetit, pasi në këtë sipërfaqe përfshihet edhe zona e ish-diskotekave verore që tashmë janë larguar.
“Ajo që duam të theksojmë është se pas tre dekadash degradimi, qytetarët e Shkupit mund të presin të marrin një lunapark të ri deri në mesin e vitit 2027”, paralajmërojnë autoritetet e qytetit.
Sipas kushteve të shpalljes publike dhe kontratës së nënshkruar, projekti ideor dhe ai bazë duhet të përfshijnë 16 pajisje argëtuese, të përpunuara në detaje me specifikime teknike dhe sipërfaqe ndërtimore në përputhje me dokumentacionin urbanistik.
Në lunaparkun e ri parashikohen: pista për makina përplasjeje, tre lloje të “roller coaster”-it (mini, për fëmijë dhe familjar), anije pirate e vogël dhe e madhe, rrotë panoramike dhe mini-rrotë panoramike, tren në shina, pajisje adrenalinike fluturuese, karusel, pajisje rrotulluese aventureske, atraksione me aeroplanë, filxhanë çaji dhe kangurë, si dhe fluturim me aeroplan.
Nga shuma totale prej mbi 620 milionë denarësh, 5,3 milionë denarë do të shpenzohen për hartimin e projektit ideor dhe atij bazë.
Sipas kontratës, realizuesi ka detyrimin të përgatisë raport për cilësinë e betonit të përdorur nga një laborator i autorizuar për testimin e betonit dhe armaturës. Gjithashtu, ai duhet të hartojë projekt të rishikuar për rrethimin e kantierit, të shënojë kufijtë dhe të vendosë gardhe rreth zonës së ndërtimit. Një tjetër detyrim i rëndësishëm është përgatitja e projektit të rishikuar për sigurimin e gropës ndërtimore sipas të gjitha standarE madhee përkatëse.
Për kujtesë, ndërtimi i lunaparkut nisi në prill të vitit 2017 gjatë mandatit të ish-kryetarit të Shkupit, Koce Trajanovski, sipas projektit ideor të kompanisë “Build Urban”. Në atë kohë, vlera e projektit ishte vlerësuar rreth 6,5 milionë euro. Projekti parashikonte 27 pajisje, prej të cilave tre adrenalinike, gjashtë familjare dhe 18 për fëmijë, si dhe luhatëse, karusele dhe rrëshqitëse.
Pasardhësi i tij, Petre Shilegov, vlerësoi se projekti nuk ishte i mirë dhe paralajmëroi ndërtimin e një parku më të madh argëtues sipas një projekti të ri, i prezantuar dy vite më vonë. Për shkak të pandemisë së koronavirusit, ndërtimi pothuajse u harrua dhe u rikthye në vëmendje si premtim parazgjedhor në zgjedhjet lokale të vitit 2021, kur u premtua si nga Shilegov ashtu edhe nga Danella Arsovska.
Arsovska premtonte se Shkupi do të merrte një park argëtues brenda dy viteve të para të mandatit të saj, të pajisur me “roller coaster”, karusele, rrëshqitëse, kinema 7D, karting dhe përmbajtje për të gjitha grupmoshat.
Megjithatë, pavarësisht premtimeve të deritanishme, breza të tërë fëmijësh të Shkupit janë rritur pa mundësinë për t’u argëtuar në një lunapark. Sipas njoftimeve të kryetarit aktual Orce Gjorgjievski, Shkupi pritet ta marrë lunaparkun e ri në vitin 2027, në 10-vjetorin e fillimit të parë të “ndërtimit” të tij në kohën e Trajanovskit. (PressOnline.al)
