Massimiliano Allegri dhe Milani po kalojnë një ndarje aspak të qetë, teksa negociatat për ndërprerjen e kontratës janë shoqëruar me tensione për mënyrën e komunikimit dhe shumën e dëmshpërblimit për trajnerin dhe stafin e tij.
Sipas raportimeve, Allegri nuk e ka pritur mirë mënyrën se si u njoftua largimi i tij, pasi klubi publikoi komunikatën zyrtare përpara se ai të merrte njoftimin direkt. Vetëm disa ditë më vonë erdhi edhe konfirmimi formal nga drejtuesit e Milanit, çka ka shtuar pakënaqësinë e trajnerit dhe ka hapur mundësinë për hapa ligjorë lidhur me dëmtimin e imazhit.
Në prapaskenë flitet edhe për një marrëveshje të mundshme të Allegri-t me presidentin e Napolit, Aurelio De Laurentiis, përpara përfundimit të sezonit. Kjo ka shtyrë vetëm zyrtarizimin e lëvizjes së tij, ndërsa Napoli po punon paralelisht për ndërtimin e skuadrës së re.
Klubi napolitan po shqyrton disa emra për përforcime, përfshirë Adrien Rabiot në mesfushë, Matej Kovar në portë dhe Mario Gila në mbrojtje, ndërsa pritet edhe vendimmarrja për lojtarët që kthehen nga huazimet. Në Castel Volturno pritet një verë e ngarkuar me ndryshime të mëdha në skuadër.
