Celine Dion ka emocionuar fansat në mbarë botën duke konfirmuar rikthimin e saj në skenë me një seri koncertesh të mëdha në Paris, pas një periudhe të gjatë larg performancave live.
Ylli kanadez i muzikës do të ngjitet në skenën e Paris La Defense Arena për 16 koncerte që do të zhvillohen nga 12 shtatori deri më 17 tetor 2026.
Lajmin e dha vetë këngëtarja përmes një video-mesazhi në rrjetet sociale, ku siguroi fansat se ndihet mirë dhe po përgatitet intensivisht për rikthimin e saj.
Jam shumë mirë, ndihem e fortë, po këndoj shumë dhe madje po kërcej pak, por kam diçka të rëndësishme për t’ju thënë
-u shpreh Dion.
Seria e koncerteve do të zhvillohet me dy performanca në javë, kryesisht të mërkurave dhe të shtunave. Datat e konfirmuara për vitin 2026 janë: 12, 16, 18, 19, 23, 25, 26 dhe 30 shtator, si dhe 2, 3, 7, 9, 10, 14, 16 dhe 17 tetor.
Për shkak të kërkesës së jashtëzakonshme nga publiku, organizatorët e “AEG Presents France” kanë njoftuar edhe 10 koncerte shtesë në pranverën e vitit 2027.
Shfaqjet e reja do të mbahen më 8, 12, 14, 15, 19, 21, 22, 26, 28 dhe 29 maj, duke e çuar në 26 numrin total të performancave të planifikuara në kryeqytetin francez.
Organizatorët kanë bërë të ditur se shitja e biletave do të jetë e rezervuar fillimisht për personat e regjistruar në sistemin e para-shitjes. Të gjithë ata që nuk arritën të siguronin bileta në raundin e parë do të kenë një mundësi të re, ndërsa kodet e aksesit dhe informacionet për blerjen do të dërgohen përmes e-mailit një ditë para hapjes së shitjeve.
Rikthimi i Celine Dion në skenë konsiderohet një nga ngjarjet më të mëdha muzikore të vitit, ndërsa fansat presin me padurim të shohin sërish një nga zërat më të njohur të muzikës botërore në performancë live.
