“Vala” e videove të krijuara me inteligjencë artificiale ka pushtuar prej muajsh YouTube, me përmbajtje të mbushur me zëra artificialë, prezantues të rremë, tituj dramatikë dhe imazhe që duken reale, por nuk janë. Tashmë, Google duket se po ndërmerr hapa konkretë për të vendosur më shumë transparencë në platformë. Kompania ka njoftuar ndryshime të reja që synojnë ta bëjnë më të qartë për përdoruesit kur një video është krijuar ose modifikuar me inteligjencë artificiale. Sipas rregullave të reja, treguesit për përdorimin e AI nuk do të fshihen më në seksionin e përshkrimit, por do të shfaqen drejtpërdrejt poshtë videos. Ndërkohë, në videot e shkurtra, njoftimi do të vendoset në pjesën e sipërme të ekranit.
Masa vjen si përgjigje ndaj rritjes së përmbajtjes me cilësi të ulët të krijuar nga AI, e cila shpesh e bën të vështirë për përdoruesit të dallojnë se çfarë është reale dhe çfarë jo. Një nga ndryshimet më të rëndësishme është se YouTube planifikon të zbulojë automatikisht videot fotorealiste të krijuara me inteligjencë artificiale, edhe në rastet kur krijuesit nuk i deklarojnë ato vetë.
Edhe pse kompania nuk ka zbuluar detaje të plota mbi teknologjinë që do të përdoret, ajo ka konfirmuar se po mbështetet në mjete si SynthID dhe standardi C2PA për identifikimin dhe gjurmimin e përmbajtjes së krijuar nga AI. Megjithatë, YouTube thekson se politika e re nuk synon të penalizojë krijuesit që përdorin inteligjencën artificiale, për sa kohë që përmbajtja deklarohet në mënyrë të qartë dhe nuk synon të mashtrojë audiencën.
Microsoft, Google, Amazon dhe Meta janë bërë pjesë e një nisme të re të udhëhequr nga organizata jofitimprurëse Elemental Impact, me synimin për të përshpejtuar zhvillimin e teknologjive që ulin ndikimin klimatik të data center-ëve. Nisma fokusohet tek zgjidhje si sistemet e avancuara të ftohjes, ruajtja e energjisë dhe materialet me karbon të ulët, përfshirë betonin dhe çelikun “e gjelbër”. Sipas drejtuesve të projektit, data center-ët po shndërrohen në një laborator testimi për teknologji të reja që lidhen drejtpërdrejt me rritjen e konsumit energjetik nga inteligjenca artificiale.
