Prokuroria e Lartë Publike do të përballet me sfidën që në mënyrë thelbësore t’i analizojë arsyet e kthesës dramatike ndërmjet narrativës fillestare për hetimin e mazutit dhe vendimit të Prokurorisë për ndërprerjen e tij, pra të sqarojë dilemat në opinion se si një rast për të cilin pretendohej se kishte kriminalitet mbi 160 milionë euro, u shndërrua në rast pa dëm, shkruan PressOnline.al
Drejtori i Koalicionit “Të Gjithë për Gjykim të Drejtë”, Darko Avramovski, për “Slloboden Peçat” shpjegon se cilat mundësi i ka Prokuroria më e lartë, pasi EMV-ja shtetërore paraqiti ankesë ndaj vendimit të Prokurorisë për Ndjekjen e Krimit të Organizuar dhe Korrupsionit dhe kërkoi kontroll nga Prokuroria Publike. Kështu, Prokuroria mund ta obligojë prokurorin që ta vazhdojë procedurën me grumbullim të provave të reja, marrje të sërishme në pyetje ose ekspertizë të re.
“Me paraqitjen e ankesës nga ana e EMV-së, tani aktivizohet mekanizmi i rregullt ligjor për kontrollin e vendimit për ndërprerjen e hetimit. Sipas Ligjit për Procedurë Penale, Prokuroria e Lartë Publike ka kompetencë ta rishqyrtojë vendimin e PTHPNKOK-së dhe të vlerësojë nëse ndërprerja e procedurës ka qenë e ligjshme dhe e bazuar. Në këtë drejtim, Prokuroria e Lartë Publike mund të ketë qasje në tërë lëndën, t’i analizojë provat e mbledhura, ekspertizat, deklaratat dhe arsyetimin e vendimit. Nëse vlerëson se ekzistojnë mangësi, gjendje faktike e paplotë ose nevojë për kontrolle shtesë, mund ta obligojë prokurorin që ta vazhdojë procedurën, gjë që nënkupton mbledhjen e provave të reja, marrjen sërish në pyetje të personave ose eventualisht ekspertizë të re. Në rastin konkret, sidomos duke pasur parasysh se bëhet fjalë për një lëndë me interes të lartë publik, me periudhë të gjatë hetimi, zbatim të masave serioze dhe narrativë të fuqishme publike rreth dëmit të pretenduar, është krejtësisht e pritshme që Prokuroria e Lartë Publike t’i shqyrtojë në detaje të gjitha aspektet e procedurës”, thotë Avramovski, përcjell PressOnline.al
Nga Prokuroria Publike, ndërkaq, shkurt thonë se do të veprojnë në përputhje me dispozitat e Ligjit për Procedurë Penale.
“Pas ankesës së paraqitur do të veprojë Prokuroria e Lartë Publike Shkup, në përputhje me dispozitat e parashikuara në Ligjin për Procedurë Penale, ndërsa publiku do të njoftohet për vendimin”, thonë nga Prokuroria.
Edhe pse prokurorja që e udhëhiqte rastin tha se kyçe për mbylljen e hetimit kanë qenë deklaratat e përfaqësuesve të EMV-së se nuk ka dëm, megjithatë kompania paraqiti ankesë dhe doli me akuza se prokurorja “e ka zhvilluar ekspertizën në mënyrë sipërfaqësore” dhe “i ka interpretuar gabimisht deklaratat e inxhinierëve”.
“Siç shihet nga urdhri për ndërprerjen e procedurës hetimore, personave teknikë të autorizuar nga SHA EMV, edhe pse jokompetentë në fushën ekonomike, nuk u është paraqitur dhe nuk janë njoftuar me ekspertizën ekonomike, ndonëse ajo ishte përpiluar para marrjes së tyre në pyetje. Në pyetjet e kryqëzuara nga përfaqësuesit juridikë të të dyshuarve gjatë marrjes në pyetje, personat teknikë të SHA EMV vetëm kanë konstatuar se sasia e përgjithshme e energjisë elektrike të prodhuar deri në prill 2023 i përgjigjej sasisë së konsumuar të mazutit në TEC Negotinë dhe në këtë aspekt kanë konstatuar vetëm se nuk ishte shkaktuar dëm ndaj planit të prodhimit, pa u elaboruar nëse sasia e konsumuar ishte në përputhje me kushtet e tenderit dhe kontratën”, pretendojnë nga EMV, përcjell PressOnline.al
Kallëzimi penal kishte të bënte me një seri keqpërdorimesh në furnizimet me mazut, ndërsa MPB-ja kur e paraqiti vitin e kaluar në mars pretendonte se shteti kishte pësuar dëm mbi 167 milionë euro përmes procedurave të kurdisura dhe transportit të mazutit deri në TEC Negotinë.
Ndërkohë, në debat është përfshirë edhe dimensioni politik i rastit. VMRO-DPMNE akuzon se pas ndërprerjes së hetimit qëndrojnë lidhje politike mes strukturave të LSDM-së, BDI-së dhe sistemit gjyqësor-prokurorial. Sipas partisë, shefi i PNKOK-së, Islam Abazi, ka afërsi me liderin e BDI-së, Ali Ahmeti, duke përmendur edhe lidhjet familjare dhe fqinjësore nga Zajazi.
“Për afërsinë e Islam Abazit me Ali Ahmetin si fqinj nga Zajazi, për të cilin sipas fotografive publike mund të shihet se vëllai i Ahmetit, Fekri Ahmeti, i qëndron mbi kokë, e dinë të gjithë”, thuhet në reagimin e VMRO-DPMNE-së.
Nga ana tjetër, Ali Ahmeti ka reaguar ndaj deklaratave dhe akuzave të deputetit të VMRO-DPMNE-së, Antonio Milloshoski, duke i cilësuar ato si presion ndaj drejtësisë dhe Prokurorisë.
“Së gjithë kohës që ushtrohet ky presion, dhe atë nga figura publike politike, kur dihet se në të kaluarën Milloshoski ka pasur probleme të ndryshme lidhur me pronën dhe padrejtësitë e zbatuara ndaj familjes së ‘Pucko Petrol’, kjo është vazhdimësi e presionit ndaj drejtësisë dhe ndikim që duan ta ushtrojnë mbi të gjithë zbatuesit e ligjit. Kjo është çështje që na shqetëson dhe do ta përcjell në të gjitha takimet e mia”, deklaroi Ahmeti.
Partia opozitare pretendon gjithashtu se vendimi për ndërprerjen e hetimit nuk është i mbështetur në argumente juridike-prokuroriale, por se ekziston dyshimi për ndikim politik nga strukturat e BDI-së dhe LSDM-së.
Javën e kaluar Prokuroria njoftoi se hetimi për keqpërdorimet e pretenduara me mazutin ishte ndërprerë për Ratko Kapushevski dhe kompaninë e tij RKM, Asmir Jahoski – djali i deputetit të BDI-së, Ismail Jahoski, ish-drejtorët e ESM-së, Vasko Kovaçevski, i arratisur, dhe Adrian Muça, Erxhan Sulkoski dhe edhe 8 të dyshuar të tjerë.
VMRO-DPMNE ngre dyshime edhe se prokurorja Katarina Kollareviq dhe shefi i PNKOK-së, Islam Abazi, mund të kenë vepruar nën ndikimin e qarqeve të afërta me Ali Ahmeti, duke e ndalur procedurën për rastin e mazutit prej 167 milionë eurosh, me qëllim shpëtimin nga përgjegjësia penale të personave të lidhur me BDI-në dhe LSDM-në.
Partia kërkon që Këshilli i Prokurorëve Publikë ta hetojë punën dhe veprimet e Islam Abazi dhe Katarina Kollareviq, duke theksuar se qytetarët meritojnë ta dinë të vërtetën e plotë për rastin “Mazut”. (PressOnline.al)
