Alarm në një bazë ajrore të SHBA-së në Idaho pas përplasjes së dy avionëve gjatë një shfaqjeje ajrore. Baza ajrore Mountain Home Air Force Base po organizonte aktivitetin ajror “Gunfighter Skies”, kur ndodhi incidenti.
Autoritetet e bazës njoftuan se ka ndodhur një “incident ajror” dhe se ekipet e emergjencës kanë ndërhyrë menjëherë në vendngjarje, ndërsa hetimet për shkaqet janë në vazhdim.
Sipas mediave lokale, dy avionë janë përplasur në ajër gjatë shfaqjes. Katër anëtarë të ekuipazhit kanë arritur të hidhen me parashutë para rrëzimit të avionëve.
Video të publikuara nga spektatorët duket se tregojnë momentin e përplasjes në ajër, ndërsa në pamje shihen edhe katër parashuta që zbresin drejt tokës.
Pamje të tjera të shpërndara në rrjetet sociale tregojnë shtëllunga të mëdha tymi të zi që ngrihen nga zona e rrëzimit. Deri tani nuk ka informacion zyrtar për viktima apo të plagosur.
