Autoritetet shëndetësore në SHBA kanë rikujtuar se macet dhe qentë nuk e transmetojnë hantavirusin te njerëzit, pas disa lajmeve që kanë ngjallur shqetësim tek pronarët e kafshëve shtëpiake. Sipas Qendrave për Kontrollin dhe Parandalimin e Sëmundjeve në SHBA (CDC), nuk ka prova që kafshët shtëpiake të jenë burim infeksioni për njerëzit.
Çfarë është hantavirusi?
Hantavirusi është një grup virusesh që zakonisht transmetohet nga brejtësit e egër, si minjtë e drerit, përmes: urinës, feçeve dhe pështymës së tyre
Njerëzit infektohen zakonisht kur thithin grimca të kontaminuara nga këto materiale, për shembull gjatë pastrimit të hapësirave të mbyllura ku kanë qenë brejtësit.
Sëmundja që shkakton quhet Hantavirus Pulmonary Syndrome (HPS) mund të jetë serioze, duke prekur mushkëritë dhe sistemin e frymëmarrjes.
Lind pyetja: e transmetojnë macet dhe qentë?
Ekspertët e shëndetit publik theksojnë se: macet dhe qentë mund të ekspozohen ndaj virusit, nëse bien në kontakt me brejtës të infektuar. Por, nuk sëmuren në mënyrë të njëjtë si njerëzit dhe nuk e transmetojnë virusin tek njerëzit.
Dr.Kate Elden, shefe mjekësore në kompaninë veterinare telemjekësore “Dutch”, shpjegoi se kafshët shtëpiake nuk janë zinxhir transmetimi për këtë virus, edhe pse mund të kenë kontakt indirekt me mjedise të infektuara.
Simptomat te njerëzit
Infeksioni me hantavirus zakonisht fillon me simptoma të ngjashme me gripin, si: temperaturë e lartë, lodhje, dhimbje muskujsh dhe marramendje.
Më pas mund të përkeqësohet shpejt dhe të shkaktojë vështirësi në frymëmarrje, duke kërkuar trajtim urgjent.
Si të mbrohemi?
Autoritetet rekomandojnë masa të thjeshta parandaluese si shmangia e kontaktit me brejtës të egër, përdorimi i dezinfektuesve kur pastrohen zona të dyshuara dhe kontrolli i hyrjes së minjve në shtëpi.
Edhe pse lajmet për raste të dyshuara kanë ngritur shqetësim, ekspertët theksojnë se rreziku nga macet dhe qentë është praktikisht i papërfillshëm kur bëhet fjalë për hantavirusin.
Burimi kryesor mbeten brejtësit e egër dhe mjediset e kontaminuara prej tyre. Në këtë mënyrë, pronarët e kafshëve shtëpiake nuk kanë arsye për panik, por vetëm për kujdes bazik higjiene e kontroll të mjedisit.
