Federata Shqiptare e Futbollit ka publikuar njoftimin ku tregon se nis shitja e biletave për Kombëtaren shqiptare, që do luajë dy miqësore në qershor. Fillimisht ndaj Izraelit dhe më pas me Luksemburgun, pikërisht te stadiumi “Air Albania”.
Çmimet variojnë nga 800 deri në 12000 lekë të reja. Rënia e çmimit është pasi sektorët pas porte ishin me 1000 lekë të reja për herë të fundit në takim miqësor.
Vendimi drastik vjen sa i përket sektorëve të katit të dytë të stadiumit, që janë aktualisht të mbyllur.
NJOFTIMI I FSHF:
Kombëtarja shqiptare rikthehet në “Air Albania” në muajin qershor për dy ndeshje miqësore ndaj Izraelit dhe Luksemburgut. Kuqezinjtë do të përballen fillimisht me Izraelin më 3 qershor, në ora 20:00, ndërsa më 6 qershor, po në ora 20:00, do të sfidojnë Luksemburgun.
Federata e Futbollit njofton të gjithë tifozët dhe futbolldashësit se biletat për këto dy sfida janë tashmë në shitje. Të interesuarit mund t’i sigurojnë ato online nëpërmjet platformës ebileta.al, të shpërndara zyrtarisht nga kompania T-Ticket, si edhe pranë pikës fizike të shitjes në stadiumin “Air Albania”
Procedura se si blihet bileta online:
Fillimisht ju duhet të regjistroheni në platformë duke përdorur një adresë e-mail.
Më pas, zgjidhni tribunën e stadiumit dhe më pas përzgjidhni ulësen.
Pasi keni përzgjedhur ulëset, duhet të plotësoni në tabelën dialoguese të dhënat për biletat (mbiemër, emër, e-mail)
Në fund procedoni me pagesën, duke plotësuar të dhënat e kartës tuaj. Pasi të konfirmohet pagesa, bileta do të mbërrijë në adresën e-mail me të cilën jeni regjistruar në platformë.
