Një studim i ri i publikuar në revistën shkencore “Journal of Agricultural and Food Chemistry” ka zbuluar se birra mund të përmbajë nivele të konsiderueshme të vitaminës B6, një lëndë ushqyese thelbësore për funksionimin e trurit, prodhimin e qelizave të gjakut dhe mbështetjen e sistemit imunitar, raportoi BBC.
Studimi u krye nga një ekip shkencëtarësh të udhëhequr nga Michael Rychlik në Universitetin Teknik të Mynihut, në Gjermani.
Ata analizuan 65 lloje birrash të blera në supermarkete në Gjermani për të matur përmbajtjen e vitaminës B6.
Sipas gjetjeve, një porcion birre mund të mbulojë rreth 15–20% të nevojës ditore për vitaminë B6, ndërsa disa birra pa alkool mund të arrijnë deri në 59%.
Në përgjithësi, një litër birrë përmban rreth 0,3 deri në 1 miligramë vitaminë B6, ndërkohë që nevoja ditore është rreth 1,4 miligramë për meshkujt dhe 1,2 miligramë për femrat.
Studiuesit theksojnë se përmbajtja e vitaminës lidhet me përbërësit bazë të birrës, si elbi, gruri dhe majaja e birrës, të cilat janë natyrshëm të pasura me këtë vitaminë dhe nuk e humbasin atë, plotësisht gjatë procesit të prodhimit.
Analiza tregoi se:
Birra e zezë kishte përmbajtje më të lartë të vitaminës B6, pjesërisht për shkak të përqindjes më të lartë të alkoolit
Birra e bardhë kishte nivele mesatare
Birra e nxjerrë nga orizi kishte nivelin më të ulët
Birra pa alkool e fermentuar plotësisht kishte më shumë vitaminë B6 se ato të prodhuara me metoda alternative
Megjithatë, shkencëtarët paralajmërojnë se këto rezultate janë të dobishme kryesisht për konsumatorët që synojnë të optimizojnë marrjen e vitaminave, dhe jo për të promovuar konsum më të lartë të alkoolit.
Ekspertët e ushqyerjes theksojnë se mungesa e vitaminës B6 është e rrallë, pasi ajo gjendet gjerësisht në ushqime si mishi, peshku, patatet, drithërat dhe bishtajoret.
Ata rekomandojnë që burimi kryesor i vitaminave të mbetet një dietë e balancuar, ndërsa pijet alkoolike nuk duhet të konsiderohen si zëvendësim ushqimor.
