BE-ja do të ngrijë paratë e destinuara për Serbinë, sepse vendi po bën hapa prapa në reformat pro-evropiane, ka mësuar N1.
Komisionerja e BE-së për Zgjerim, Marta Kos, do ta njoftojë zyrtarisht këtë në takimin e sotëm të Komitetit të Punëve të Jashtme të Parlamentit Evropian (AFET).
Vendi do të humbasë 1.5 miliardë euro nga “Plani i Rritjes” për shkak të reformave të diskutueshme gjyqësore.
Megjithatë, vendimi përfundimtar do të merret pasi Komisioni i Venedikut të shpallë opinionin e tij mbi të ashtuquajturat “ligje Mrdić”.
Për më tepër, të gjashtë vendet e Ballkanit Perëndimor përballen me mundësinë e privimit nga më shumë se 700 milionë euro.
Siç ka mësuar N1, i gjithë Ballkani po humbet mundësinë për të marrë këto para nëse nuk arrin të përmbushë detyrat e reformës deri më 30 qershor. Këto janë reforma që duhej të përfundonin deri në fund të qershorit të vitit të kaluar, por ky afat është shtyrë ndërkohë.
Kos do të paralajmërojë për këtë mundësi në takimin e sotëm të AFET-it, në mënyrë që vendet të kuptojnë se koha po mbaron.
