Një postim viral në rrjetet sociale ka rikthyer në fokus biotinën, e njohur si vitamina B7, duke pretenduar se ajo mund të ulë ndjeshëm nivelin e sheqerit në gjak brenda pak javësh. Por sa qëndron ky pretendim?
Interesi është rritur pas përmendjes së disa studimeve, ku doza të larta të biotinës, rreth 9 mg në ditë, janë përdorur te persona me Diabeti tip 2 që nuk reagonin mirë ndaj trajtimeve standarde.
Në disa raste, është vënë re një ulje e konsiderueshme e nivelit të glukozës në gjak, madje deri në përgjysmim, pa rritje të insulinës. Këto rezultate, të arritura në një kohë relativisht të shkurtër, kanë nxitur debat dhe optimizëm.
Megjithatë, ekspertët theksojnë se duhet shumë kujdes në interpretimin e këtyre të dhënave.
Biotina është një vitaminë e rëndësishme që ndihmon në metabolizmin e karbohidrateve, yndyrnave dhe proteinave, si dhe në prodhimin e energjisë në organizëm. Ka indikacione që personat me diabet mund të kenë nivele më të ulëta të saj, çka e bën këtë temë edhe më tërheqëse për studime.
Por, pavarësisht rezultateve premtuese, studimet janë ende të kufizuara dhe nuk përfshijnë një numër të madh pacientësh. Për këtë arsye, biotina nuk mund të konsiderohet si trajtim apo zgjidhje për diabetin. Për më tepër, përdorimi i dozave të larta pa këshillë mjekësore mund të sjellë efekte të padëshiruara.
Mjekët këshillojnë që pacientët të mos bëjnë ndryshime në terapinë e tyre pa u konsultuar me specialistin. Menaxhimi i Diabeti tip 2 kërkon një qasje të plotë, që përfshin trajtimin e duhur, ushqyerjen e balancuar dhe aktivitetin fizik të rregullt.
