Martesa nuk është vetëm një status ligjor. Studimet tregojnë se ajo shkakton ndryshime të dukshme në personalitet, duke i bërë partnerët më të përgjegjshëm, por shpesh më pak socialë dhe më pak të duruar. Sipas një studimi që ndoqi 169 çifte të sapomartuara për 18 muaj, dy vitet e para të martesës ndryshojnë ndjeshëm tiparet bazë të personalitetit. Burrat priren të bëhen më të ndërgjegjshëm dhe më të besueshëm, ndërsa gratë fitojnë më shumë stabilitet emocional, duke raportuar nivele më të ulëta ankthi dhe zemërimi.
Martesa ka ekzistuar për mijëra vjet dhe dikur ishte “pothuajse universale”, sipas Andrew J. Cherlin. Por normat e martesës po bien dhe kjo mund të nënkuptojë që disa njerëz po humbasin një përfitim të mundshëm shëndetësor. “Është sikur jemi ndarë në dy shoqëri të ndryshme”, tha Cherlin, profesor në Universitetin Johns Hopkins, i cili studion sociologjinë e familjes, duke theksuar avantazhet që mund të sjellë martesa.
Një studim i publikuar në revistën Cancer Research Communications sugjeron se martesa mund të lidhet me një rrezik më të ulët për kancer, duke shtuar një seri kërkimesh që e lidhin atë me përmirësim të përgjithshëm të shëndetit. Sipas studimit, meshkujt që nuk janë martuar kurrë kanë 68% më shumë raste kanceri krahasuar me ata që kanë qenë të martuar.
Tek gratë, ky dallim është edhe më i lartë: 83% më shumë rrezik për ato që nuk janë martuar kurrë. Studiuesit theksojnë se arsyet mund të jenë të ndryshme. Për disa lloje kanceri, si ai i endometrit dhe vezoreve, ndikimi mund të lidhet me faktorët riprodhues, pasi gratë që nuk kanë lindur fëmijë kanë rrezik më të lartë për këto sëmundje.
Kur çiftet përballen me konflikte në martesë, roli i nënës shpesh ndikohet më shumë se ai i babait, sidomos në marrëdhënie ku gruaja është më e lidhur emocionalisht dhe burri më i tërhequr. Durimi i nënës dhe aftësia e saj për të shprehur dashuri ndaj fëmijëve mund të ulet ndjeshëm për shkak të tensioneve bashkëshortore, shpesh më shumë sesa te babai.
