Këngëtari i njohur Justin Bieber ka festuar 32-vjetorin e lindjes, ndërsa një nga urimet më emocionuese erdhi nga nëna e tij, Pattie Mallette. Përmes një mesazhi të ndjerë, ajo kujtoi momentin kur u bë nënë, duke e përshkruar ardhjen në jetë të Justinit si pikën që ndryshoi gjithçka për të. “32 vite më parë, jeta ime mori një tjetër kuptim. U bëre djali im, zemra ime dhe mësimi im më i madh për dashurinë. Që nga ai moment, asgjë nuk ka qenë më njësoj. Ti ke qenë gjithmonë në zemrën time,” shkroi ajo.
Në rreshtat e saj, Mallette theksoi mbështetjen e pakushtëzuar dhe besimin e palëkundur që ka ndaj të birit. Ajo nënvizoi se dashuria e saj nuk është zbehur asnjëherë, pavarësisht sfidave që ai ka kaluar ndër vite. “Unë e di kush je dhe e di çfarë force dhe qëllimi ke brenda vetes. Besoj se Zoti ka qenë gjithmonë pranë teje dhe nuk e ka larguar dorën nga jeta jote. Ai është aty dhe unë gjithashtu. Dashuria ime për ty nuk është larguar kurrë dhe nuk do të largohet,” u shpreh ajo.
Duke folur për të ardhmen e artistit, Patti la të kuptohet se rrugëtimi i tij ka ende shumë për të dhënë. Sipas saj, përpara tij ka ende mision, rritje dhe momente shpengimi. “Ka kaq shumë përpara teje. Ka ende qëllim, zhvillim dhe bekime në pritje. Pavarësisht viteve që kalojnë, ti do të mbetesh gjithmonë një nga dhuratat më të çmuara që kam marrë në jetë,” shtoi ajo. Në fund të mesazhit, Mallette i uroi të birit një vit të ri të mbushur me qartësi, besim dhe forcë shpirtërore, duke e mbyllur me një deklaratë të thjeshtë, por të fuqishme: “Gëzuar 32-vjetorin. Të dua gjithmonë, Justin Drew Bieber.”
