Agjencia Kombëtare e Shoqërisë së Informacionit publikoi sot një vlerësim nga Instituti Vjenez për Studime Ndërkombëtare Ekonomike (Austri) dhe Think Europe (Slloveni), në kuadër të nismës “converge2eu”, e cila monitoron përparimin e vendeve të Ballkanit Perëndimor drejt standardeve të Bashkimit Evropian.
Sipas AKSHI-t, raporti thekson se Shqipëria kryeson rajonin për përdorimin e shërbimeve publike online.
Në njoftim, thuhet se vendi ynë është i vetmi në Ballkanin Perëndimor, mbi mesataren e BE-së për këtë tregues. Ndërkohë, vendet e tjera të rajonit mbeten ndjeshëm më poshtë, në disa raste edhe duke u larguar nga procesi i konvergjencës.
AKSHI cilëson se ky rezultat konfirmon se digjitalizimi është një nga pikat më të forta të Shqipërisë në procesin e afrimit me standardet e BE-së.
Renditja sipas raportit:
Shqipëria
Serbia
Kosova
Mali i Zi
Maqedonia e Veriut
Bosnjë-Hercegovina
Raporti vlerëson gjithashtu përparimin e ndjeshëm që vendi ka bërë në transformimin digjital të administratës publike, lehtësimin e aksesit të qytetarëve në shërbime dhe rritjen e efikasitetit në ofrimin e tyre.
