Humoristi dhe krijuesi i njohur në rrjetet sociale, Steve Bridges, ka ndërruar jetë në moshën 41-vjeçare. Lajmin e hidhur e konfirmoi bashkëshortja e tij, Chelsey, përmes një videoje prekëse të postuar në TikTok, ku Bridges numëronte mbi 2 milionë ndjekës falë skeçeve të tij të veçanta dhe humorit të tij origjinal.
Chelsey bëri të ditur se ai ndërroi jetë më 15 tetor, “i qetë në gjumë”, teksa po pushonte në divanin e shtëpisë së tyre në Peoria, Illinois.
Policia lokale konfirmoi se vdekja e tij ka qenë natyrale.
Ajo që shihnit në internet ishin vetëm personazhet që ai krijonte… Në jetën e përditshme, ai ishte babai më i dashur dhe bashkëshorti më i mirë
-u shpreh ajo mes lotësh.
Në përshkrimin e videos, ajo shtoi:
Ai me të vërtetë ka ikur. Nuk ishte vetëm një personazh i rrjeteve sociale, por një njeri që jetonte për familjen dhe për të bërë të tjerët të qeshnin.
Steve Bridges u bë i njohur për videot e tij në stilin POV dhe për personazhet e shumta që krijonte, duke ofruar një humor të pastër, të ngrohtë dhe njerëzor.
Vdekja e tij ka tronditur komunitetin online, me mijëra ndjekës që kanë ndarë mesazhe ngushëllimi dhe mirënjohjeje për ndikimin pozitiv që ai pati në jetët e tyre.
