Gal Gadot ndodhet aktualisht në Londër, ku po xhiron filmin e saj më të ri aksion, “The Runner”, me regji nga Kevin Macdonald. Xhirimet janë zhvilluar nën masa të shtuara sigurie, pasi prania e saj ka sjellë edhe reagime të forta nga aktivistë pro-palestinezë.
Sipas Daily Mail, aktorja izraelite u fotografua në një nga skenat e filmit, ku shfaqej me pamje të plagosur, e rrethuar nga oficerë policie që siguronin zonën e xhirimeve.
Në “The Runner”, Gadot luan rolin e një avokateje të fuqishme që përpiqet të shpëtojë djalin e saj të rrëmbyer, ndërsa ndjek udhëzime të fshehta nga një telefonues misterioz.
Filmi përfshin gjithashtu aktorët Pierre Bergman, Christopher Moore, Robert James Smith, Ruby Valentino dhe Millicent Wong.
Megjithatë, xhirimet nuk kanë qenë të qeta. Aktivistët pro-palestinezë kanë protestuar pranë vendndodhjeve të xhirimeve, duke e akuzuar Gadot për mbështetje ndaj ushtrisë izraelite.
Aktorja, e cila ka shërbyer në Forcat e Mbrojtjes së Izraelit, është shprehur më herët se është “krenare për vendin e saj”, deklaratë që ka nxitur reagime të shumta në rrjete sociale.
Në qershor, Gadot pranoi se ishte “e tmerruar” pasi protestat e aktivistëve çuan në ndërprerjen e xhirimeve për rreth 20 ditë, duke rrezikuar edhe ecurinë e projektit.
Disa zëra madje pretenduan se ajo mund të tërhiqej nga filmi, duke shkaktuar tensione në ekipin e produksionit.
Aktualisht, “The Runner” vijon xhirimet në Londër, dhe pritet të publikohet gjatë vitit të ardhshëm.
