Supermodelja braziliane Alessandra Ambrosio bëri një rikthim spektakolar në “Victoria’s Secret Fashion Show 2025” në New York, duke i lënë të gjithë pa fjalë me elegancën dhe energjinë e saj. Në moshën 44-vjeçare, ylli i modës tregoi se magjia dhe vetëbesimi nuk njohin moshë.
Ambrosio u shfaq në pasarelë me dy veshje mahnitëse.
Në paraqitjen e parë, ajo veshi një kostum banje të artë-metalizuar me krahë që dukeshin sikur përfshiheshin nga flakët, duke reflektuar fuqinë dhe sensualitetin që e kanë bërë ikonë të kësaj shtëpie mode.
Në daljen e dytë, ajo ndryshoi stilin, duke u shfaqur me një kostum të zi me rrjetë dhe krahë gjigantë fluture, një kombinim që simbolizonte rikthimin dhe transformimin e saj në pasarelë.
Rikthimi i saj ndezi rrjetet sociale, ku fansat e përgëzuan për pamjen dhe freskinë e saj rinore.
Ajo nuk plaket kurrë
-shkruanin ndjekësit në komentet që pushtuan rrjetet.
E lindur më 11 prill 1981 në Erechim, Brazil, Ambrosio nisi karrierën e saj në moshën 15-vjeçare pas pjesëmarrjes në konkursin *Elite Model Look Brazil.
Ajo u zbulua nga Elite Model Management dhe shumë shpejt u bë një nga fytyrat më të kërkuara në industrinë e modës, duke u shfaqur në kopertinat e Vogue, Harper’s Bazaar, Elle dhe GQ, si dhe në fushata për brendet më të mëdha si Ralph Lauren, Dolce & Gabbana, Dior dhe Calvin Klein.
Debutimi i saj në pasarelën e Victoria’s Secret ndodhi në vitin 2000, duke shënuar fillimin e një bashkëpunimi që do të zgjaste afro dy dekada.
Në vitin 2004, ajo mori statusin e shumëkërkuar të “engjëllit” të brendit, përkrah emrave legjendarë si Gisele Bündchen, Adriana Lima dhe Heidi Klum.
Ambrosio u bë një nga figurat më të dashura të Victoria’s Secret, duke hapur shfaqjen e vitit 2005 me krahët prej karamele dhe duke mbajtur Fantasy Bra në 2012 dhe 2014, pjesët më luksoze të koleksionit, të punuara me gurë të çmuar me vlera milionëshe.
Sot, Alessandra Ambrosio mbetet një nga ikonat më të mëdha të modës botërore, me një karrierë që mishëron glamurin, profesionalizmin dhe qëndrueshmërinë e epokës së artë të supermodeleve.
Rikthimi i saj në pasarelën e këtij viti konfirmoi edhe një herë statusin e saj si një nga engjëjt më të paharrueshëm në historinë e Victoria’s Secret.
