Unioni i Gazetarëve Shqiptarë (UGSH) nga Shqipëria ka reaguar pas denoncimit të gazetarit Naser Selmani, i cili raportoi se automjeti i tij është dëmtuar nga persona ende të paidentifikuar.
Në deklaratën e bërë publike, UGSH shprehet se i bashkohet reagimeve të kolegëve në Maqedoninë e Veriut dhe shpreh shqetësimin për incidentet e përsëritura dhe gjuhën kërcënuese ndaj gazetarëve në vendin fqinj.
“Ky akt i dhunshëm është i papranueshëm dhe duhet të marrë përgjigjen e duhur nga organet e rendit. Kërkojmë nga policia dhe institucionet e hetimit zbardhjen e rastit, identifikimin e autorëve dhe vënien e tyre para përgjegjësisë ligjore”, thuhet në reagimin e Unionit.
UGSH thekson se sulmet e tilla nuk janë vetëm kundër një gazetari, por goditje ndaj vetë lirisë së medias dhe demokracisë.
