Pas dominimit të motivit leopard gjatë vitit 2025, bota e modës po përqafon një trend të ri dhe më të guximshëm për vitin 2026: tiger print. Motivi me vija karakteristike po rikthehet fuqishëm në pasarela, street style dhe koleksionet e shtëpive të mëdha të modës, duke marrë vendin e animal print-it më të preferuar të momentit.
I frymëzuar nga estetika e viteve ’70, ’90 dhe fillimi i viteve 2000, printi i tigrit sjell një stil më ekzotik dhe vizualisht të fortë. Edhe një detaj i vetëm si një pallto, çantë apo geta, mjafton për të transformuar tërësisht një veshje.
Shtëpitë prestigjioze të modës kanë kontribuar në rikthimin e këtij trendi. Chanel prezantoi një fustan luksoz me motiv tigri në shfaqjen Métiers d’Art 2026 në New York City, ndërsa Chloé dhe Jacquemus sollën pallto me frymë vintage.
Në të njëjtën kohë, stilistja Marine Serre e ktheu getën portokalli me tiger print në një fenomen në rrjetet sociale.
Ndërsa motivi leopard tashmë është kthyer në një zgjedhje klasike dhe të përditshme, tigri po merr “fronin” si protagonisti i ri i modës, duke sjellë një energji më të fortë dhe më të guximshme në stilin modern.
