Andy Burnham ka marrë drejtimin e qeverisë britanike, duke u bërë kryeministri i shtatë i Mbretërisë së Bashkuar në vetëm një dekadë.
Kryeministri në largim, Keir Starmer mbajti fjalimin e tij të fundit jashtë selisë së qeverisë në “Downing Street”, ku deklaroi se mandati i tij kishte përfunduar.
“Ishte privilegji i jetës sime të shërbeja si kryeministër i këtij vendi. Largohem me mirësjellje dhe me një buzëqeshje, krenar për punën që kemi bërë. Pavarësisht gjithë fokusit tek individët, politika do të jetë gjithmonë një sport ekipor dhe ndryshimet që kemi sjellë për vendin dhe partinë tonë u përkasin të gjithë atyre që kanë luftuar për to”, tha Starmer.
Starmer tha se largohej me bindjen se vendi ishte më i fortë se në momentin kur ai mori drejtimin e tij.
“Ndërsa tani ia kaloj stafetën Andy Burnham, i uroj atij çdo sukses. Ai ka mbështetjen time të plotë”, u shpreh ai.
Në fjalimin e parë si kryeministër, Burnham pritet të vendosë drejtimin e ri të qeverisë, duke premtuar një ndryshim të madh në mënyrën e qeverisjes, me fokus te problemet që prekin drejtpërdrejt qytetarët, si kostoja e lartë e jetesës, ekonomia dhe shërbimet publike me probleme.
/vizionplus.tv
