Zyrtare: Yamal mëson shkallën e saktë të lëndimit, ja sa kohë pritet të mbetet jashtë fushave

Barcelona pritet të jetë pa Lamine Yamal deri në fund të sezonit, pasi testet e kryera të enjten në mëngjes konfirmuan një çarje në hamstring.

Sulmuesi 18-vjeçar u dëmtua në ndeshjen ndaj Celta Vigos të mërkurën mbrëma, ku shënoi nga pika e bardhë e penalltisë, gol që rezultoi i mjaftueshëm për t’i siguruar Barcelonës tri pikët.

Talentit të ri iu besua penalltia dhe ai e dërgoi topin fuqishëm në cep, por pothuajse menjëherë u kthye dhe i bëri shenjë bankinës së Barcelonës për zëvendësim.

Më pas u shtri në fushë dhe, pas ndërhyrjes së stafit, u ndihmua të çohej në këmbë, përpara se të largohej duke çaluar. Që para përfundimit të ndeshjes, dyshimet ishin se kishte pësuar çarje në hamstring.

Lamine Yamal pritet të mungojë rreth pesë deri në gjashtë javë, çka do ta lërë jashtë të gjitha ndeshjeve të mbetura të Barcelonës në La Liga. Tani pikëpyetja kryesore është në çfarë gjendjeje fizike do të arrijë ai te Kupa e Botës.

Ndeshja e parë e Spanjës në Botëror është në Atlanta, më 15 qershor, ndaj Kepit të Gjelbër. Sipas këtij afati, Yamali do të rikthehej rreth dy javë para duelit hapës.

Ndërkohë, Barcelona duhet të ruajë epërsinë ndaj Real Madridit në garën për titull. Katalanasit kanë një avantazh prej nëntë pikësh ndaj “Los Blancos”, me gjashtë ndeshje të mbetura.

Seria vazhdon të shtunën me Getafen në “Coliseum”, më pas me një tjetër transfertë ndaj Osasunës në “El Sadar”, për të kulmuar me pritjen e Real Madridit në “Camp Nou”.