“Efekti Messi” për ndeshjen kundër Real Salt Lake: biletat në shitje mbi 10.000 dollarë

Efekti i Lionel Messit vazhdon të ndihet fuqishëm edhe jashtë fushës. Për ndeshjen mes Inter Miami dhe Real Salt Lake, kërkesa për bileta ka shpërthyer deri në atë pikë sa çmimet në tregun sekondar kanë arritur nivele ekstreme, duke kaluar edhe 10.000 dollarë për një vend.

Interesimi i madh i tifozëve për ta parë yllin argjentinas në aksion ka bërë që biletat të shiten shumë shpejt dhe më pas të rishiten me çmime astronomike, përcjell “Gazeta Express”.

Në disa platforma rishitjeje, çmimet kanë shkuar shumëfish më lart se vlera fillestare, duke reflektuar “Messi efektin” që e ka transformuar kërkesën për ndeshjet e Inter Miamit.

Fenomeni nuk është i ri që nga ardhja e Messit në MLS, por kjo ndeshje kundër Real Salt Lake ka nxitur një interes të veçantë, sidomos për shkak të pritshmërisë që ai të jetë në fushë.

Kjo ka bërë që tregu i biletave të shndërrohet në një ankand të vërtetë, ku çmimet variojnë nga disa qindra deri në mbi 10 mijë dollarë për vendet më të kërkuara.

Ky nivel kërkese e tregon edhe një herë ndikimin global të Messit, i cili vazhdon të mbetet një magnet i madh për tifozët dhe të ardhurat në futbollin amerikan.