Strategjia e Shkupit përballë një realiteti të ri në Sofje

Taktika e Qeverisë së Maqedonisë së Veriut, pas fitores së Hristijan Mickoski dhe VMRO-DPMNE-së në vitin 2024, ishte të mos votohen ndryshimet kushtetuese si kusht i “Propozimit francez” dhe të pritet formimi i një qeverie stabile në Bullgari, me të cilën do të hapej dialog për çështjet e hapura dypalëshe dhe do të zhbllokohej procesi i integrimit evropian, shkruan PressOnline.al

Megjithatë, pas fitores së Rumen Radev dhe forcimit të ndikimit të tij politik, shtrohet pyetja nëse ky skenar është ende i realizueshëm, apo nëse pozicionet bullgare ndaj vetos do të forcohen edhe më tej në Bruksel.

Rumen Radev, ish-gjeneral i forcave ajrore dhe një nga figurat më të njohura politike në Bullgari, pas një dekade në postin e presidentit ka hyrë më aktivisht në skenën ekzekutive politike, duke synuar të marrë rol më të drejtpërdrejtë në qeverisje. Ai njihet për qëndrime të forta dhe të pandryshuara ndaj çështjes maqedonase, të cilat i ka përsëritur si gjatë fushatës, ashtu edhe pas fitores së tij politike.

Koha (nuk) punon për Maqedoninë

Politika e jashtme e Shkupit në raport me fqinjët shpesh është mbështetur në dy qasje kryesore: shtyrja e zgjidhjes së problemeve për një periudhë të pacaktuar, me shpresën se koha do të sjellë kushte më të favorshme ose pranimi i kompromisave, përfshirë edhe kushte të pafavorshme, për të shmangur bllokimin e procesit eurointegrues.

Në këtë kontekst, Qeveria e Mickoskit mund të përballet me vështirësi në justifikimin e strategjisë së pritjes, nëse vendi detyrohet të pranojë të gjitha kushtet e “Propozimit francez”, si dhe kërkesa shtesë të mundshme nga pala bullgare, veçanërisht në lidhje me çështjet historike dhe punën e komisionit të përbashkët.

Radev ka deklaruar se nuk do të tërhiqet nga qëndrimet ekzistuese dhe i mbështetur nga legjitimiteti i fitores politike, pritet të ketë një pozicion të fortë në raport me çështjen e vetos, sidomos në një moment kur Brukseli pret nga Sofja ruajtjen e kursit aktual të politikës së jashtme.

A është vërtet i hapur “dritarja e zgjerimit të BE-së”?

Pas konsolidimit të pushtetit në Bullgari, pritet që vëmendja të zhvendoset drejt Brukselit, ku do të testohet realisht gatishmëria për zgjerim të Bashkimit Evropian.

Nëse ekziston vullnet politik për përshpejtimin e procesit të integrimit të Maqedonisë së Veriut, kjo do të duhet të reflektohet në hapjen efektive të negociatave dhe në dinamikë më të shpejtë të tyre.

Megjithatë, në kushtet aktuale, është e vështirë të pritet një ndryshim i shpejtë i qëndrimeve të Sofjes, veçanërisht në raport me garancitë e kërkuara për përfshirjen e bullgarëve në Kushtetutën e Maqedonisë së Veriut, të cilat vazhdojnë të mbeten një nga kushtet kyçe për zhbllokimin e procesit.

Marrëdhëniet ndërmjet Shkupit dhe Sofjes pritet të hyjnë në një fazë më të strukturuar dialogu, me intensifikim të kontakteve diplomatike dhe përpjekje për rikthimin e besimit. Megjithatë, zgjidhja përfundimtare e mosmarrëveshjeve mbetet ende e paqartë.(PressOnline.al)