Miratohet Plani kombëtar për energji dhe klimë 2025–2030

Qeveria ka miratuar Planin kombëtar të integruar për energji dhe klimë 2025-2030 – një dokument strategjik që e vendos vendin në një rrugë të qartë drejt transformimit energjetik, zhvillimit të qëndrueshëm dhe përputhshmëri të plotë me politikat evropiane. Plani, i përgatitur me propozim të Ministrisë së Energjisë, Minierave dhe Lëndëve të Para, përbën një instrument kyç për modernizimin e sektorit energjetik dhe përmbushjen e detyrimeve nga Komuniteti i Energjisë dhe rregullativa evropiane.

“Me gjithsej 61 masa konkrete, Plani përfshin 26 masa për dekarbonizim; 20 për efikasitet energjetik; tre për siguri energjetike; 11 për tregun e brendshëm të energjisë dhe një për hulumtim, inovacion dhe konkurrueshmëri. Fokusi është i qartë – ulja e emetimeve të gazrave serrë, rritja e burimeve të rinovueshme të energjisë dhe përmirësimi i ndjeshëm i efikasitetit energjetik”, njoftoi MEMLP.

Në periudhën e ardhshme, thuhet në njoftim, shteti do të ndërmarrë hapa konkretë për rritjen e investimeve në energjinë diellore, të erës dhe hidroenergjinë, vendosjen e një sistemi çmimi të karbonit sipas standarE madhee evropiane, zhvillimin e ruajtjes së energjisë dhe infrastrukturës moderne energjetike, si dhe braktisjen graduale të qymyrit si burim energjie. Paralelisht, po forcohet siguria energjetike përmes diversifikimit të burimeve, bashkëpunimit rajonal dhe interkoneksioneve të reja, si dhe liberalizimit të mëtejshëm dhe integrimit të tregut të energjisë elektrike.

Theksohet se me zbatimin e Planit pritet përmirësim i ndjeshëm i cilësisë së mjedisit jetësorë, stabilitet dhe pavarësi më e madhe energjetike, një cikël i ri investimesh në sektorin e energjisë, përshpejtim i tranzicionit të gjelbër dhe zhvillim ekonomik.

“Ky dokument është një vizion i qartë për të ardhmen energjetike të shtetit, në të cilin qëndrueshmëria, inovacioni dhe standardet evropiane bëhen realitet”, thonë nga Ministria e Energjisë, Minierave dhe Lëndëve të Para.