​Chivu: Vetëm Interi mund ta bëjë përmbysje të tilla

Cristian Chivu ka vlerësuar karakterin e skuadrës së tij pas një tjetër përmbysjeje spektakolare ndaj Comos, duke theksuar se vetëm njw skuadwr e çmendur si Interi është në gjendje të rikuperojë dy herë nga disavantazhi 2-0 brenda një periudhe kaq të shkurtër. Interi arriti të përmbysë rezultatin edhe në gjysmëfinalen e Kupës së Italisë, duke vazhduar formën e jashtëzakonshme që kishte treguar më herët në Serie A ndaj të njëjtit kundërshtar.

Trajneri rumun u ndal te kontributi i lojtarëve që u aktivizuan nga stoli, duke theksuar rëndësinë e tyre në suksesin e skuadrës. “Ne kemi një skuadër që ka luajtur shumë mirë që nga fillimi i sezonit, kështu që kur thirren, tregojnë se çfarë mund të bëjnë”, deklaroi Chivu, duke shtuar se “ata që erdhën nga stoli e kuptuan momentin dhe treguan guxim”. Ai përmendi veçanërisht performancën e lojtarëve si Diouf, Sucic dhe Pio Esposito.

Chivu foli edhe për situatën e Denzel Dumfries, duke zbuluar se mbrojtësi kishte probleme fizike dhe ishte i gatshëm vetëm për pak minuta lojë. “Ai ndjeu dhimbje në tendin, por ishte gati të provonte. Jam i kënaqur që shoh lojtarë të gatshëm të japin gjithçka për klubin”, tha trajneri, duke vlerësuar fleksibilitetin e ekipit në menaxhimin e situatave të vështira gjatë ndeshjes.

Në fund, trajneri i Interit theksoi objektivat e mëdha të sezonit, me skuadrën që kryeson bindshëm Serie A dhe ka siguruar finalen e Kupës së Italisë. “Ne e fituam vendin tonë këtu me punë të palodhur dhe jemi në një pozicion që na lejon të ëndërrojmë për titullin dhe trofeun”, u shpreh ai, duke shtuar: “Të përmbysësh një disavantazh 2-0 kundër Comos dy herë në 10 ditë, vetëm “Pazza Inter” mund ta bëjë këtë.”