Fillon Panairi i Librit me mbi 60 botues dhe më shumë se 130 promovime

Me moton “Hape një dritare drejt botëve të reja” nga sot deri më 29 prill në arenën “Boris Trajkovski” në Shkup do të mbahet Panairi i 38-të i Librit, hapja e të cilit këtë vit përkon me Ditën Botërore të Librit dhe të Drejtës së Autorit.

Gjatë shtatë ditëve të panairit organizatorët nga Panairi i Shkupit presin 30.000 vizitorë, më shumë se 130 promovime të titujve dhe autorëve, si dhe pjesëmarrjen e mbi 60 shtëpive botuese. Është paralajmëruar një program i pasur me zbritje të veçanta dhe promovimeve të botimeve të reja, takime me autorë, panele letrare dhe punëtori interaktive.

“Panairi i Librit mbetet një nga ngjarjet më të rëndësishme kulturore, i cili bashkon publikun nga i gjithë vendi dhe nga jashtë, e nxit kulturën e leximit dhe krijon hapësirë për lidhje mes autorëve, botuesve dhe lexuesve. Në vitet e fundit vërehet veçanërisht një rritje e pranisë së gjeneratës së re, e cila gjithnjë e më shumë po i kthehet formës së shtypur të librave dhe kontribuon në pjesëmarrjen e lartë në ngjarje”, thuhet në njoftim.

Ndër mysafirët ekskluzivë të autorëve të huaj është autorja amerikane e trilerëve psikologjikë, Sara Pekanen, si pjesë e programit të “Ars Lamina”, përmes shtëpisë botuese “Dua libra” vjen shkrimtarja italiane Viola Ardone – autore e librit të njohur “Treni i fëmijëve”, i cili tashmë ka marrë edhe adaptimin e tij në “Netfliks”. Në stendën e qendrës botuese “TRI” do të jetë i pranishëm autori holandez Hajs Vilbrink, “Antolog” i cili ka paralajmëruar pjesëmarrjen e autores së trilerëve Irsa nga Islanda, ndërsa shkrimtari çek Jirzhi Hajiçek është mysafir special i “Slavika Libris”.

Orari i punës së Panairit të Librit është nga ora 10:00 deri në orën 20:00. Me çdo biletë të rregullt të blerë për panairin do të dhurohen fonde për SOS Fshati i fëmijëve. Biletat janë të disponueshme edhe onlajn në: https://www.karti.com.mk/saem-na-kniga-2026.nspx

Panairi i Librit edhe këtë vit mbështetet nga Ministria e Kulturës dhe Turizmit. Në mënyrë solemne do të hapet sot në orën 13:00, në prani të organizatorëve të tij dhe përfaqësuesve të shtëpive botuese, si dhe kryetarit të Shkupit, Orce Gjorgjievskit. Sipas njoftimit të organizatorëve, panairin zyrtarisht të hapur do ta shpallë presidentja e shtetit, Gordana Siljanovska-Davkova.