SHBA miraton paketat e para të armëve për Ukrainën të financuara nga aleatët e NATO-s

Paketat e para të ndihmës amerikane për armët për Ukrainën nga administrata Trump janë miratuar dhe së shpejti mund të dërgohen, ndërsa Uashingtoni rifillon dërgimin e armëve në Kiev – këtë herë sipas një marrëveshjeje të re financiare me aleatët, thanë për Reuters dy burime të njohura me situatën.

Ky është përdorimi i parë i një mekanizmi të ri të zhvilluar nga SHBA-të dhe aleatët, për të furnizuar Ukrainën me armë nga rezervat amerikane duke përdorur fonde nga vendet e NATO-s.

Nënsekretari i Mbrojtjes për Politikën, Elbridge Colby ka miratuar deri në dy dërgesa prej 500 milionë dollarësh sipas mekanizmit të ri të quajtur Lista e Kërkesave të Prioritizuara për Ukrainën, e njohur nën akronimin PURL, thanë burimet.

Bashkëpunimi i ripërtërirë transatlantik, i cili synon të forcojë Kievin me armë me vlerë deri në 10 miliardë dollarë, vjen ndërsa presidenti i SHBA-së, Donald Trump ka shprehur zhgënjim me sulmet e vazhdueshme të Moskës ndaj fqinjit të saj, pavarësisht përpjekjeve të tij për të arritur një fund të negociuar të konfliktit.

Deri më tani, administrata Trump ka shitur vetëm armë në Ukrainë ose ka dërguar donacione të autorizuara nga ish-presidenti Joe Biden, i cili ishte një mbështetës i flaktë i Kievit.

Burimet refuzuan të jepnin një inventar të saktë të asaj që është miratuar për blerje nga evropianët për Ukrainën, por thanë se përfshinte sisteme të mbrojtjes ajrore, të cilat i duhen urgjentisht Ukrainës duke pasur parasysh rritjen e madhe të sulmeve ruse me dronë dhe raketa.