Shqipëria ka marrë një tjetër dritë jeshile në rrugën drejt anëtarësimit në Bashkimin Evropian.
Kryeministri Edi Rama njoftoi se të mërkurën është hapur një kapitull i ri i negociatave – konkretisht Grupkapitulli 4, që përfshin Agjendën e Gjelbër dhe Ndërlidhjen e Qëndrueshme.
Sipas Ramës, ky vendim i vendeve anëtare të BE-së është një vlerësim për përgatitjet dhe progresin që ka bërë Shqipëria në këtë drejtim.
“Ky vendim i vendeve anëtare të BE konfirmon përgatitjen tonë dhe progresin konkret në rrugën drejt familjes europiane”, ka shkruar ai.
Ai theksoi se kapitujt që përfshihen në këtë grup janë:
Politikat e transportit (Kapitulli 14)
Energjia (Kapitulli 15)
Rrjetet trans-evropiane (Kapitulli 21)
Mjedisi dhe klima (Kapitulli 27)
“Ky është një hap tjetër drejt Shqipërisë 2030 – një vend krenar i Bashkimit Evropian”, shtoi Rama.
Shqipëria hapi kapitullin e parë të negociatave në tetor të vitit 2024. Vendi kishte aplikuar për anëtarësim në vitin 2009 dhe mori statusin e kandidatit në vitin 2014.
Për të përfunduar procesin e anëtarësimit, Shqipëria duhet të hapë dhe mbyllë 33 kapituj negociatash, ku për secilin nevojitet miratimi i të gjitha shteteve anëtare të BE-së.
