Ylli i Barcelonës, Lamine Yamal, po bën histori si ikona argjentinase Lionel Messi.
Sensacioni 17-vjeçar pritet të jetë titullar për Spanjën kundër Francës në gjysmëfinalet e UEFA Nations League, me të dyja skuadrat që luftojnë për një vend në finale kundër Portugalisë në Mynih.
Ishte viti i kaluar kur Yamal tërhoqi vëmendjen e botës, duke luajtur një rol kryesor në Kampionatin Europian të vitit 2024, ku Spanja mposhti Anglinë në finale për të fituar trofeun.
Goli i tij mahnitës në gjysmëfinale kundër Francës u shpall si Goli i Turneut, dhe ai u kurorëzua si lojtari më i mirë i ri i kampionatit.
Edhe pse është ende herët për ta krahasuar Yamal drejtpërdrejt me njërin prej më të mëdhenjve të të gjitha kohërave, paraqitjet e tij kanë tërhequr vëmendjen e botës së futbollit.
A është Yamal “Messi i ri”?
Drejtori sportiv i Barcelonës, Deco, foli për BBC Match of the Day për Lamine Yamal, ku bëri një krahasim të drejtpërdrejtë mes Yamal dhe Messit.
Dhe ka të bëjë me mënyrën se si ai po i bën tifozët të mendojnë kur blejnë bileta për ndeshjet.
“Lamine është Lamine. Leo është Leo. Leo ishte lojtari më i mirë në historinë e këtij klubi dhe për mua, lojtari më i mirë në histori,” tha Deco.
“Pra, nuk është e lehtë të krahasosh këto gjëra, por Lamine, në aspektin e cilësisë, në të njëjtën mënyrë mund të bëjë histori si Leo.
“Lamine është një lojtar ndryshe që bën të gjithë të çmenden kur e shohin duke luajtur futboll, këto lloj lojtarësh që të bëjnë të paguash për të shkuar në stadium për ta parë.
“Ai është i veçantë. Ai është ndryshe dhe këtë e kemi ditur që kur erdhi tek ne para dy vitesh. Por kurrë nuk e di si do të reagojë një lojtar në këtë moshë në nivelin më të lartë, dhe ai e tregoi se ishte i pabesueshëm në Europian, kur fitoi me kombëtaren e tij. Por këtë sezon ai dha diçka më shumë me ne, sepse tregoi sa i mirë është në ndeshjet më të mëdha, sa i qetë është, sa i pjekur është. Pra, është ndryshe.
“Nuk është normale për një 17-vjeçar, por ne jemi me fat që e kemi Laminën me ne. Ishte e pabesueshme.”
Yamal do të jetë i etur për ta vërtetuar atë që tha Deco, kur Spanja e tij të përballet me Francën.
Në një sfond interesant, ai do të përballet me Ousmane Dembele-n e Paris Saint-Germainit, i cili është favorit i fortë për Topin e Artë pas triumfit të PSG-së në Ligën e Kampionëve.
Yamal do të dëshirojë të tregojë pse nuk duhet të injorohet. /GazetaExpress/
