Në këtë sezon të paparashikueshëm, kur një ditë bie shi dhe tjetra ka diell përvëlues, të zgjedhësh çfarë të veshësh në mëngjes është sfidë më vete. Por edhe këtë herë, inspirimi i përsosur pranveror vjen nga një ikonë e stilit elegant dhe të thjeshtë: Letizia Ortiz, mbretëresha e Spanjës.
Pamja për t’u kopjuar nga Letizia
Gjatë një aktiviteti për Ditën Botërore të Kryqit të Kuq në qytetin Murcia, Letizia u shfaq me një veshje elegante dhe të rehatshme: një këmishë e bardhë me jakë të lidhur me fjongo nga Hugo Boss, pantallona blu të errëta me bel të lartë dhe mocasina me takë të lartë nga Massimo Dutti. Veshja e saj ishte shembulli ideal i shprehjes “më pak është më shumë”, ku detajet bëjnë diferencën.
Vëmendjen e të gjithëve e tërhoqën pantallonat në stil marinar, me kopsa të arta anash dhe prerje të drejtë që përshtatet në mënyrë perfekte me siluetat më të vogla. Pantallonat janë nga marka franceze Sezane, e njohur për elegancën, feminilitetin dhe çmimet e arsyeshme. Çmimi i tyre? 130 euro në faqen zyrtare.
Pantallonat në stil marinar janë kthyer fuqishëm
Pamja e Letizia-s na kujton se stili marinar është një nga trendet më të forta të vitit 2025. I thjeshtë për t’u kombinuar dhe gjithmonë elegant – qoftë në qytet, qoftë kur jemi pushime.
