Trajneri Liridon Leci i ka dalë punë me polici. Leci i cili udhëheq Flamurtarin, pas ndeshjes që ekipi i tij e humbi në shtëpi me Ramiz Sadikun 5:1, nuk ka mundur ta mbaj kontrollën e nervozizmit.
Ndeshja u zhvillua të shtunën dhe i takoi xhiros së katërt të grupit B të Ligës së Parë, derisa Lecin e paraqiti në polici gjyqtari kryesor i kësaj ndeshje, Ersen Janovali. Komisioni i Garave i Federatë së Futbollit të Kosovës ka njoftuar se gjyqtari Janovali e ka paraqitur në polici pas kërcënimeve gjatë dhe pas përfundimit të ndeshjes nga trajneri i Flamurtarit, Liridon Leci.
“Pas ndëshkimit kryetrajneri Liridon Leci humb tërësisht kontrollin dhe fillimisht i shkel këmbën gjyqtarit kryesor, bën dorën grusht dhe fillon ta ofendojë rëndë atë personalisht dhe familjen e tij. Pasi gjyqtarët kanë hyrë në zhveshtore pas pak hyn edhe Liridon Leci dhe vazhdon të ofendojë në baza familjare dhe tenton ta sulmojë gjyqtarin kryesor, mirëpo pengohet nga dy asistentët e gjyqtarit kryesor, pastaj ndërhyn policia dhe e largon nga zhveshtorja e gjyqtarëve. Pas përfundimit të ndeshjes dhe të nesërmen, i njëjti ka vazhduar me kërcënimin përmes rrjeteve sociale për çka gjyqtari kryesor i kësaj ndeshje ka hapur rast në polici”, shkruan tutje në raportin e KG të FFK-së.