Policia e Kosovës, përmes një njoftimi ka treguar se Drejtoria Rajonale në Prishtinë, është informuar lidhur me shqetësimet e ngritura, pas pamjeve të publikuara ku shihet duke u rrahur fëmija tre vjeçar në një çerdhe në Fushë Kosovë.
Në njoftimin e tyre thuhet se policia ka marrë me seriozitet pretendimet e ngritura dhe menjëherë kanë filluar hetime në lidhje me çështjen.
Tutje, thuhet se zyrtarët policorë janë duke vijuar punën për mbledhjen e provave, intervistimin e personave që në çfarëdo rrethanë kanë mundur të jenë të përfshirë në rast, si dhe raportet mjekësore.
“Aktualisht zyrtarët policor po vijojnë punën për mbledhjen e të gjitha provave që janë të arritshme, intervistimin e personave që në çfarëdo rrethane dhe çfarëdo cilësie kanë mundur të jenë të implikuar në rast, po shqyrtohen raportet mjekësore, pamjet e publikuara si dhe po analizohen ato”, thuhet në njoftim.
Policia ka treguar se të gjitha veprimet janë në koordinim me prokurorin e shtetit, dhe se po bashkëpunojnë ngushtë me të gjitha agjencitë për mbrojtjen e fëmijëve.
“Ndonëse e kuptojmë interesin e publikut për çështjen, si dhe shqetësimin e komunitetit e veçmas prindërve dhe kujdestarëve, ne duhet të jemi të vëmendshëm për të balancuar nevojën për transparencë me nevojën për të mbrojtur integritetin e hetimit”, janë shprehur policia.
Ata kanë kërkuar mirëkuptim nga të gjithë, duke thënë se mirëqenia e fëmijëve është prioritet, por janë të përkushtuar që hetimet t’i kryejnë në mënyrë profesionale, në mënyrë që të zbardhet e vërteta.