Nga: Destan JONUZI
“Diktati bullgar”, “planet” e Evropës dhe botës për të thyer “stoicizmin” e Mickoskit janë pjesë e fjalorit me të cilin VMRO-ja përpiqet të arsyetojë qëndrimin e saj kundër ndryshimeve kushtetuese, e me këtë edhe qëndrimin e saj kundër heqjes së pengesave në udhëtimin e vendit drejt anëtarësimit të plotë në BE.
Në këtë drejtim, nëse shkojmë sipas logjikës së Mickoskit, dhe kundërshtimit të tij, bllokimi i perspektivës euroatlantike të shtetit mund të parapëlqehet si “diktat”.
Shumica e qytetarëve, pa dallim etnike, fetare apo përkatësie tjetër, janë për integrimin e shtetit, ndërsa për shkak të “diktatit” të Mickoskit pengohen të përfitojnë nga të mirat e integrimit dhe shteti nuk mund të realizojë përcaktimin e saj strategjik.
Si “luftë”, pra, një betejë politike është krejtësisht e palogjikshme, por edhe një lëvizje e paarsyeshme politike, gjeopolitike dhe gjeostrategjike!
Çdo dështim i amendamenteve kushtetuese dhe rrjedhimisht i rrugëtimit drejt BE-së, do të rrisë ambiciet e shfrenuara të Rusisë për ndikim në Maqedoninë e Veriut, do të zhvlerësojë ekonominë, do të prishë ekuilibrin e marrëdhënieve të mira ndëretnike, ndërkohë që SHBA-të dhe vendet e fuqishme të BE-së do fillojmë të na shohin si një vend që nuk është partner serioz…
Bullgaria nuk shihet më si një vend që e pengon Maqedoninë e Veriut që të fillojë negociatat për anëtarësim, por vet Mickoski “qëllon veten në këmbë”, ai dhe VMRO, në mënyrë arbitrare dhe për shkak të “diktatit” të tyre të pakuptueshëm dhe të panevojshëm, “qëllojnë në zemër” – të ardhmen dhe perspektivën e vendit.
Mund edhe të “vrasin” shpresën për një moment! Por ata nuk mund të varrosin përcaktimin strategjik pro-BE dhe pro-amerikan të qytetarëve të këtij vendi!
Mickoski dhe “diktati” i tij nuk japin argument se kundërshtimi i tyre është çështje ideologjike, por se janë (pa)përgatitur të jenë përgjegjës për të ardhmen euroatlantike të shtetit.
Është i verbër, i hutuar dhe me çdo kusht mendon se me këtë “diktat” mund të kthehet në pushtet! Populizmi, nacionalizmi, qëndrimet anti-perëndimore dhe anti-shqiptare janë vetëm një justifikim propagandistik.
Ndaj, do të ishte mirë që forcat përparimtare në partinë e Mickoskit ta ndihmonin kryetarin e tyre që në këto momente serioze gjeopolitike pas agresionit rus në Ukrainë ta heqë qafe këtë “diktim” infantil dhe të reflektojnë për të ardhmen e të gjithëve!(Frontline)