Parlamenti Evropian miratoi të martën vendimin për liberalizimin e vizave për qytetarët e Kosovës – me çka edhe procedurat vendimmarrëse për këtë çështje përmbyllen dhe qytetarët tani presin vetëm hyrjen në fuqi të vendimit dhe udhëtojnë lirshëm.
Miratimi në Parlamentin Evropian u bë pa votim, pasi nuk kishte asnjë kundërshtim.
E pas këtij vendimi ka pasur reagime të shumta nga Kosova, si nga institucionet e subjektet politike.
Një të tillë e ka bërë edhe kryeministri i vendit Albin Kurti, i cili tha se liberalizimi i vizave ndodhi sot, ndërsa ka falënderuar eurodeputetët për përkrahje në këtë proces.
“Liberalizimi i vizave ndodhi sot. Nga data 1 janar 2024, qytetarët e Kosovës do të kenë mundësi që të udhëtojnë lirshëm në zonën shengen. Kjo është meritë e të gjithëve, veçanërisht e qytetarëve tanë. Andaj urime të gjithëve, sepse është për të gjithë. Falënderojmë eurodeputetët, Parlamentin Evropian dhe shtetet e Bashkimit Evropian për votën, vendimin dhe mbështetjen”, ka shkruar Kurti.
