Ndryshimet kushtetuese, Maksuti: Ndërmjetësim ndërkombëtarë për gjetjen e një konsensusi

featured

Opozita parlamentare, VMRO, Alternativa, e Majta dhe Lidhja Demokratike refuzojnë të përfshihen në grupet e punës për ndryshimet kushtetuese në Ministrinë e Drejtësisë. Nga VMRO-DPMNE konsiderojnë se ndryshimet kushtetuese nuk mund të arrihen pa konsensus të popullit maqedonas. Alternativa refuzon të delegojë përfaqësues të saj për shkak të mungesës së konsensusit politik. Ndërkohë kundërshtimi i dy partive të tjera vijon si kundërpërgjigje e mohimit në vazhdimësi të gjuhës dhe autenticitetit maqedonas nga pala bullgare. Profesori universitar, Mersim Maksuti, konsideron se për aktivizimin e grupeve të punës nevojitet konsensus i gjerë politik pasi për votimin e ndryshimeve duhen dy të tretat e votave.

“Ndryshimet kushtetuese tashmë dihet botërisht se kërkojnë një konsensus të gjerë politik, me vetë faktin se kërkohet dy e treta e votimit nga të gjithë anëtarët e Kuvendit dhe kjo pa mëdyshje kërkon mbi të gjitha një kompromis politik për hapjen e iniciativës, për hapjen e procedurës së ndryshimeve kushtetuese.”, – deklaroi për TVM2, eksperti i së drejtës kushtetuese, Mersim Maksuti, përcjell PRESSonline.al

Unifikimi i qëndrimeve sipas Maksutit duhet të iniciohet nga presidenti në një takim liderësh. Ai nuk përjashton mundësinë që edhe ndërhyrja ndërkombëtare të japë efektin e duhur.

“Duket se pa një presion, pa një ndërmjetësim më të fuqishëm, në radhë të parë nga presidenti i shtetit, duke u nisur nga roli kushtetues që i takon, por pa mëdyshje mund të vijë dhe ndërmjetësimi ndërkombëtarë i faktorit ndërkombëtarë për uljen dhe për gjetjen e një konsensusi për ndryshimet e kushtetutës.”, – theksoi eksperti i së drejtës kushtetuese, Mersim Maksuti.

Pa këto elemente, sipas Maksutit grupet e punës mund të jenë një dështim, aq më tepër kur vetë procedura që në start kërkon dy të tretat e numrit të përgjithshëm të votave të deputetëve në Kuvend për t’u kryer ndryshimet.

Ndryshimet kushtetuese, Maksuti: Ndërmjetësim ndërkombëtarë për gjetjen e një konsensusi